श्री सिध्देश्वर मंदिर

Discover this amazing place

शिवभक्तीचे,शिवोपासकांचे पीठ अशी पूर्वीपासून आळंदीची ओळख आहे त्याचे प्रमाण म्हणजे सिध्देश्वराचे मंदिर. हे अतिशय प्राचीन शिवलिंग आहे.या पुरातन शिवमंदिराच्या डाव्या बाजूस अजानवृक्षाच्या छायेखाली संत श्री ज्ञानेश्वर महाराज यांचे समाधीस्थान आहे. समाधीच्या वेळी या शिवाचा ढवळा नंदी उठवून विवराची शिळा उघडली होती. माउलींच्या समाधीचे दर्शन घेऊन बाहेर आलात कि सिध्देश्वराकडे जाता येते.या मंदिराचे तीन भाग आहेत ते असे. १) नंदी, २) गाभारा. सिध्देश्वर मंदिराच्या बाहेर एका दगडी देवळातील नंदिकेश्वराची मूर्ती विराजीत आहे. ती संगमेश्वरी कृष्ण पाषाणाची असून पश्चिमाभिमूख व काहीशी उंचीवर आहे. नंदीच्या उजव्या बाजूला दोन पायऱ्या आहेत व वर स्फटीकाच्या पादूका आहेत. येथूनच श्री ज्ञानदेव समाधीस्थानी गेले. त्यासंबंधीचे मोठ्या बहारीचे वर्णन नामदेवरायांनी आपल्या अभंगातून केलेले आहे. मध्यावर शिवपींड आहे . तीवर एक अभिषेक पात्र टांगलेले आहे. समोर आपल्या उजव्या हाताच्या कोपऱ्यात एका देवळीत गणेश मूर्ती आहे. दर्शन झाल्यानंतर बरेच लोक थोडा वेळ मंदिरात बसतात कारण शिवाच्या सानिध्यात शांतीचा अनुभव होतो.मंदिराचे वातावरणच तसे आहे. जुनाट शिवपीठ आहे. गाभाऱ्यावर शिखर आहे. त्याचे बांधकाम केव्हा झाले ते समजत नाही. ज्ञानेश्वर महाराजांचे पालखी प्रस्थानास निघते त्यावेळी श्री सिध्देश्वर माऊलींना निरोप देतात.त्याप्रसंगी या मंदिराचा कळस हलतो. अद्यापही हि साक्ष पहावयास मिळते असे भाविक सागंतात.सिध्देश्वराच्या पाठीमागेच माउलींच्या मंदिराचे पश्चिमद्वार आहे.